Yohanes 12

Hyang Yesus Kaminyakin ring Desa Betania

Nem dina sadereng rarainan Paskah, Hyang Yesus luas ka Desa Betania, inggih punika desan Lasaruse, anak sane sampun kauripang malih saking padem olih Hyang Yesus. 2 Warga desane ngaturang ajengan ring Hyang Yesus buat ngajiang Ida tur Ni Marta sane ngayahin irika. I Lasarus taler ngajeng sareng-sareng Hyang Yesus irika. 3 Raris Ni Maria rauh makta tengan liter minyak narwastu sane miyik tur mael. Irika ipun ngaminyakin cokor Hyang Yesuse tur nyusutin nganggen rambutnyane. Raris bo miyik ngalub ngebekin umahe punika.

4 Nanging irika pada wenten Yudas Iskariot, inggih punika sisian Hyang Yesuse sane jagi nyerahang Ida kapining para penguasane. Ipun mabaos sapuniki, 5 “Ngudake lengis narwastune ene tusing kaadep aji telung atus pis perak tur pipisne kapakidihang sid anake tiwas?” 6 I Yudas mabaos sekadi punika nenten ja krana ipun rungu kapining anak tiwas, nanging krana ipun demen ngamaling. Ipun sane ngurus jinah kas, nanging ipun sering ngamaling jinahe punika.

7 Hyang Yesus raris ngandika sapuniki, “Depang ja Ni Maria nganggon minyake ento buat dina tatkala Tiang kapendem. 8 Krana setata ada galah buat ragane nulungin anak tiwas, nanging Tiang tusing ja setata ada ajak ragane.”

Para Pemimpin Rsi Pada Adung Jagi Ngamademang I Lasarus

9 Akeh anak Yahudine mirengin indik Hyang Yesus wenten ring Desa Betania sane mawinan ipun sami mrika. Ipun mrika taler buat nyingakin I Lasarus, anak sane sampun kauripang malih saking padem olih Hyang Yesus. 10 Punika mawinan para pemimpin pada adung jagi ngamademang I Lasarus. 11 Krana ulian I Lasarus punika, akeh anak Yahudine nenten malih nugtug pemimpin rsine nanging pracaya kapining Hyang Yesus.

Anake Akeh Nyambut Hyang Yesus Dados Raja

12 Benjangane, anake akeh sane rauh buat marainan Paskah mirengin orti indik Hyang Yesus mamargi nuju Kota Yerusalem. 13 Irika raris ipun sami ngambil don palem buat nyambut Hyang Yesus saha masuryak sapuniki,

“Hosana!

Dumogi ja kaswecanin Anake sane rauh dados utusan Sang Hyang Tunggal!” (Kidung 118:26)

“Dumogi ja kaswecanin Sang Raja anak Israele!”

14 Duk punika Hyang Yesus polih keledai sane nguda aukud raris Ida malinggih ring duur keledai punika. Paindikane puniki sampun katulis ring Cakepan Sucine sapuniki,

15 “Sampunang ja jejeh duh warga Yerusalem,

cingak ja Rajan ragane rauh,

malinggih ring duur keledai sane nguda.” Sakaria 9:9; Sepanya 3:16

16 Duk punika, para sisian Hyang Yesuse nenten ngerti artin paindikan sane mamargi punika. Nanging sasampune Hyang Yesus kaagungang olih Sang Hyang Pengardi, wawu para sisiane eling napi sane katulis ring Cakepan Sucine indik Ida. Makasamine punika mamargi manut sekadi napi sane katulis irika.

17 Duk idumun Hyang Yesus ngamanggil I Lasarus saking kuburan guane tur nguripin ipun saking padem, akeh anake wenten irika. Ipun sami sering ngicen kasaksian indik Hyang Yesus. 18 Kasaksiane punika kapirengin olih anake lianan. Punika mawinan wenten anak akeh ngrauhin Hyang Yesus krana ipun sami mirengin indik Hyang Yesus sane makarya paindikan sane ngangobin punika. 19 Punika mawinan para anak saling mabaos sapuniki, “Rencanan iragane sampun pocol niki! Cingakin ja, anake sami sampun ngiring Ipun!”

Makudang Anak Yunani Ngrereh Hyang Yesus

20 Saking anake akeh sane luas ngaturang bakti ritatkala rarainan Paskah ring Kota Yerusalem punika, wenten pada makudang anak nenten Yahudi. 21 Ipun sami rauh ring I Pilipus sane maasal saking Kota Betsaida Wawidangan Galilea. Ipun mabaos sapuniki, “Jero, tiang meled matemu sareng Sang Guru.” 22 Raris I Pilipus nyeritayang paindikane punika ring I Andreas. Sasampune kenten ipun sareng kalih nyeritayang paindikane punika kapining Hyang Yesus.

23 Hyang Yesus ngandika kapining ipun sami sapuniki, “Sampun rauh galah Sang Putraning Manusa kaagungang. 24 Tiang ngandikayang sane patut, sujatine yening bibit sane abulih nenten ulung ka tanahe tur mati, bibite punika tileh abulih. Nanging yening bibite punika mati, ia bakal liu ngasilang gandum. 25 Kenten pada, sira ja sane ngutamayang uripne ring sekala, ipun jagi kelangan uripne sane sujati. Nanging sira ja sane ngetohin uripne krana nugtug Tiang, ipun jagi miara uripne kantos polih urip sujati salamin-laminne. 26 Sira ja sane ngayahin Tiang musti nugtug Tiang, mangdane ring dija ja Tiang meneng, pengayahe punika masih wenten sareng-sareng irika. Sira ja sane ngayahin Tiang bakal kaajiang olih Ajin Tiange.”

Hyang Yesus Ngandikayang indik Ida jagi Padem

27 “Sane mangkin manah Tiange inguh paling; napi sapatutne sane nikayang Tiang? Pantes ke Tiang matur sapuniki, ‘Duh Aji, ja Titiang saking galahe sane keweh puniki?’ Nenten patut sekadi punika, krana Tiang rauh mangda nyalanang galah sane keweh puniki. 28 Duh Aji, agungang ja parab Ajine!”

Irika raris kapirengin suara saking langite sane masabda sekadi puniki, “ sampun ngagungang parab Nirane tur Nira malih jagi ngagungang parab Nirane.”

29 Anake akeh sane ngadeg tur mirengin suarane punika mabaos sapuniki, “Punika suaran kerug.” Nanging wenten pada sane mabaos sapuniki, “Suarane punika sane mabaos kapining Ida.”

30 Raris Hyang Yesus ngandika kapining ipun sami sapuniki, “Suarane punika kapirengin boya ja buat Tiang, nanging buat ragane sami mangdane ragane pracaya kapining Tiang. 31 Sane mangkin sampun rauh galahe manusane ring gumine kaakimin. Kenten pada sane nguasain gumine, nenten tios ratun para setane, katundung tur kuasane kaenyagang. 32 Nanging ritatkala Tiang kapenekang saking gumine puniki, Tiang jagi ngranayang anake sami mresidayang rauh sid Tiange.” 33 Ida ngandika sekadi punika buat nguningayang punapike carane Ida jagi seda.

34 Irika raris anake akeh punika mabaos sapuniki, “Titiang sami mirengin saking indik sane kajanjiang olih Sang Hyang Pengardi punika jagi maurip salamin-laminne. Napi mawinan Iratu ngandika Sang Putraning Manusa musti kaunggahang saking gumine? Sirake sujatine Sang Putraning Manusa punika?”

35 Raris Hyang Yesus ngandika sapuniki, “Wantah malih ajebos pisan galange wenten ring tengah-tengah ragane sami. Ritatkala galange punika wenten sid ragane, urip ja sid galange punika mangdane ragane nenten kakuasain olih petenge. Krana anake sane mamargi ring petenge nenten uning kija ipun luas. 36 Mungpung galange wenten sid ragane, pracaya ja kapining galange punika, mangdane ragane dados anak galang.”

Sasampune Hyang Yesus ngandika sapunika, Ida raris luas saking irika tur nenten kayun ngedengang angga kapining ipun sami.

Anak Yahudine Keweh Pracaya

37 Yadiastun Hyang Yesus sampun akeh nglaksanayang paindikan sane ngangobin ring arepan ipune sami, nanging ipun kari nenten pracaya kapining Ida. 38 Paindikane punika mamargi mangda patut sekadi trawangan dane Yesaya, inggih punika Sang Hyang Pengardi idumun. Dane nulis sekadi puniki,

“Duh Ratu, wantah akidik pisan anake sane pracaya kapining napi sane ortiang titiang sami!

Risedek Iratu ngedengang kuasan Iratune, ipun nenten ja rungu!” Yesaya 53:1

39 Punika mawinan ipun sami nenten prasida pracaya krana dane Yesaya taler sampun nikayang sabdan Sang Hyang Pengardine sapuniki,

40 “Nira ngukum ia makejang apanga tusing mabalik sid Nirane.

Nira nadiang matane buta,

apanga tusing ningalin.

Nira nadiang papinehne bengkung,

apanga tusing ngerti.

Yen sing keto, ia makejang lakar buin mabalik tur Nira nyegerin ia makejang.” Yesaya 6:10

41 Dane Yesaya mabaos sapunika krana sampun nyingakin kaagungan Sang Prabu Sane Kajanjiang lan nyeritayang indik Ida.

42 Yadiastun sekadi punika, akeh pada para pemimpin anak Yahudine pracaya kapining Hyang Yesus. Nanging ipun nenten ngaku krana jejeh yening anak Parisine nenten ngicen ipun ngranjing ring bale wantilan agama Yahudine. 43 Ipun seneng kaajiang olih manusa bandingang kaajiang olih .

Manusane jagi Kaakimin manut Pengandikan Hyang Yesuse

44 Irika raris Hyang Yesus ngandika antuk suara keras sapuniki, “Sapa sira ja sane pracaya kapining Tiang, sujatine nenten ja pracaya kapining Tiang kamanten, nanging ipun pada pracaya kapining Ida sane ngutus Tiang. 45 Tur sapa sira ja sane nyingakin Tiang nyingakin Ida sane ngutus Tiang. 46 Tiang rauh ring jagate puniki dados galang mangdane sekancan anake sane pracaya kapining Tiang nenten meneng ring petenge. 47 Anake sane mirengin pengajahan Tiange nanging nenten ninutin pengajahane punika, nenten ja Tiang sane ngukum ipun. Krana Tiang rauh nenten ja buat ngakimin manusane nanging buat ngrahayuang ipun. 48 Anake sane nulak Tiang lan nenten mirengin pengajahan Tiange, sampun wenten sane ngakimin ipun. Pengajahan sane nikayang Tiang punika dados ukuran sane kaanggen ngakimin ipun ring pamuput jamane. 49 Krana pengandikan Tiange nenten saking Tiang praragan, nanging saking Ajin Tiange sane ngutus Tiang. Ida sane mrentahang napi sane musti nikayang Tiang. 50 Tur Tiang uning prentah Sang Hyang Aji ngicen urip sane sujati salamin-laminne. Punika mawinan Tiang ngajahin sekadi sane kaprentahang olih Sang Hyang Aji.”

Penuntun mabligbagan ring pasamuan:

1. Ngaturang penyuksma.

“Ngiring ja iraga ngaturang suksma mangkin. Semeton jagi ngaturang suksma indik napi?”

2. Ceritayang ja pakeweh semetone suang-suang raris iraga saling tunas icayang.

“Napike semeton wenten pakeweh mangkin?”

3. Ngwacen utawi mirengin paplajahane puniki.

4. Saurin ja pitakenne puniki:

“Napi sane plajahin iraga indik Sang Hyang Tunggal ring ceritane puniki?”

“Napi sane plajahin iraga indik manusa saking ceritane puniki?”

“Sekadi napike sapatutne iraga nyalanang idup manut pengajahane puniki?”

“Kapining sirake sapatutne iraga nyeritayang malih ceritane puniki?”